ဆင်းရဲနွမ်းပါးမှုနှင့် မြို့ပြကျေးလက်ဖွံ့ဖြိုးမှု ကွာဟခြင်း

ရခိုင်ပြည်နယ်အတွင်း ဖြစ်ပေါ်ခဲ့သော အကြမ်းဖက်ဖြစ်ရပ်များကဲ့သို့ ပြည်တွင်းမငြိမ်သက်မှုများ၊ ရာသီဥတု ပြောင်းလဲခြင်းကြောင့် ဖြစ်ပေါ်လာသော ဆိုးကျိုးများ၊ သဘာဝဘေးအန္တရာယ်ဆိုင်ရာ ပြဿနာများတို့နှင့်အတူ ဆင်းရဲနွမ်းပါးမှု မြို့ပြကျေးလက်ဖွံ့ဖြိုး မှု ကွာဟချက်တို့ကြောင့် ဖြစ်ပေါ်လာရသော အခက်အခဲများစွာ ရှိနေသည်။ စိုက်ပျိုးရေးကို အခြေခံသလို သဘာဝသယံဇာတပေါများသော နိုင်ငံအဖြစ် ကမ္ဘာကအသိအမှတ်ပြုခံခဲ့ရသည့် မြန်မာနိုင်ငံအနေဖြင့် စားနပ်ရိက္ခာဖူလုံသော နိုင်ငံအဖြစ် သတ်မှတ်ကြသော်လည်း အထက်ပါကဲ့သို့ အခက်အခဲများက စားနပ်ရိက္ခာနှင့် အာဟာရဖူလုံမှု ပြဿနာများ၊ ရွှေ့ပြောင်းနေထိုင်မှု ပြဿနာများကို ဖြေရှင်းရန်လိုအပ်ချက်များ ရှိနေဆဲဖြစ်သည်။

မြန်မာနိုင်ငံတွင် ၂၀၁၀ ပြည့်နှစ်၌ ကောက်ယူခဲ့သည့် Integrated Household Living Condition Survey စစ်တမ်းအရ ဆင်းရဲမှုမျဉ်းအောက်တွင် နေထိုင်သူ ၂၅ ဒသမ ၆ ရာနှုန်းခန့်ရှိပြီး အများစုမှာ လယ်ယာလုပ်ငန်းကို အဓိကအသက်မွေးဝမ်းကျောင်းအဖြစ် လုပ်ကိုင်သည့် ကျေးလက်ဒေသနေ ပြည်သူများဖြစ်ကြောင်း၊ ၂၀၁၆ ခုနှစ် Global Nutrition Report အရ မြန်မာနိုင်ငံ၏ အာဟာရဖွံ့ဖြိုးမှုအဆင့်ဟာ ၁၃၆ နိုင်ငံအနက် အဆင့် ၁၀၆ တွင်သာရှိနေကြောင်း၊ နိုင်ငံ၏ ဆင်းရဲနွမ်းပါးမှုလျှော့ချနိုင်ရန်၊ စားနပ်ရိက္ခာနှင့် အာဟာရဖူလုံမှုရှိစေရန်အတွက် ကျေးလက်ဒေသများကို ဖွံ့ဖြိုးတိုးတက်အောင် ဆောင်ရွက်ပေးရမည်ဖြစ်ကြောင်း စသည်တို့ကို အောက်တိုဘာ ၁၆ ရက်က ပြုလုပ်သော ကမ္ဘာ့စားနပ်ရိက္ခာနေ့ အခမ်းအနားတွင် ဒုတိယသမ္မတက ပြောကြားထားသည်။ နိုင်ငံ၏ စီးပွားရေးမူဝါဒတွင် စားနပ်ရိက္ခာဖူလုံရေးနှင့် ပို့ကုန်မြှင့်တင်ရေးအတွက် ထည့်သွင်းချမှတ်ထားသည့်အပြင် လယ်ယာကဏ္ဍနှင့် ကျေးလက်ကဏ္ဍ ဖွံ့ဖြိုးမှုလုပ်ငန်းများကို နှစ်စဉ်စီမံကိန်း၊ နှစ်တိုငါးနှစ်စီမံကိန်း၊ အနှစ် ၂၀ စီမံကိန်း၊ အမျိုးသားဘက်စုံစီမံကိန်းများဖြင့်လည်း ဆောင်ရွက်နေကြောင်း၊ ထို့ပြင် ကျေးလက်ဒေသဖွံ့ဖြိုးရေး မဟာဗျူဟာ မူဘောင်ဖြင့်လည်း ချမှတ်ဆောင်ရွက်နေကြောင်း၊ ပြည်တွင်းပြည်ပ ရွှေ့ပြောင်းနေထိုင်မှုကိုဖြစ်စေသော အဓိကအကြောင်းရင်းဖြစ်သည့် မြို့ပြနှင့်ကျေးလက်ကွာဟချက်ကို ကျဉ်းမြောင်းလာစေရန်အတွက်လည်း ကုလသမဂ္ဂက ချမှတ်ထားသည့် သတ်မှတ်ချက်များနှင့်အညီ ကျေးလက်လူမှုစီးပွားဆိုင်ရာ အခြေခံအဆောက်အအုံများကို နိုင်ငံတော်အနေဖြင့် နှစ်စဉ် ပိုမိုရင်းနှီးမြှုပ်နှံ ဆောင်ရွက်ပေးလျက်ရှိကြောင်း၊ မြန်မာနိုင်ငံအနေဖြင့် ကမ္ဘာ့ကုလသမဂ္ဂ၏ ရေရှည်ဖွံ့ဖြိုးတိုးတက်ရေး ရည်မှန်းချက်များအတိုင်း မိမိနိုင်ငံ ဖွံ့ဖြိုးတိုးတက်စေဖို့ ချမှတ်ထားပြီးဖြစ်သည့် စီးပွားရေးမူဝါဒများနှင့်အညီ ဆောင်ရွက်ပေးနေသော ရင်းနှီးမြုပ်နှံမှုများသည် ကမ္ဘာ့စားနပ်ရိက္ခာနှင့် စိုက်ပျိုးရေးအဖွဲ့၏ ၂၀၁၇ ခုနှစ် ကမ္ဘာ့စားနပ်ရိက္ခာနေ့ အခမ်းအနားဆောင်ပုဒ် (Change the future of Migration, Invest in food security and rual development) နှင့်ကိုက်ညီနေကြောင်း၊ အခြားကုလသမဂ္ဂ အဖွဲ့ဝင်နိုင်ငံများနည်းတူ စားနပ်ရိက္ခာဖူလုံရေးနှင့် ကျေးလက်ဒေသ ဖွံ့ဖြိုးတိုးတက်ရေးနယ်ပယ်များတွင် ပိုမိုရင်းနှီးမြှုပ်နှံရန် စီစဉ်ဆောင်ရွက်သွားမှာဖြစ်ကြောင်း စသည်တို့ကိုလည်း ဒုတိယသမ္မတက ထည့်သွင်းပြောကြားခဲ့သည်။

နေရပ်စွန့်ခွာ ရွှေ့ပြောင်းခြင်းများသည် ကျေးလက်ဒေသဖွံ့ဖြိုးမှု နည်းပါးခြင်းကြောင့်ဖြစ်သလို စားနပ်ရိက္ခာ ဖူလုံမှုဆိုင်ရာ လိုအပ်ချက်များ၊ မြို့ပြကျေးလက်ဖွံ့ဖြိုးမှု ကွာဟနေခြင်းကို ဖြေရှင်း၍ ကျေးလက်ဒေသဖွံ့ဖြိုးရေးဆိုင်ရာ အစီအမံများနှင့် မိရိုးဖလာလုပ်ငန်းများကို လုပ်ကိုင်ကြခြင်းမရှိတော့ဘဲ နေရပ်စွန့်ခွာ ရွှေ့ပြောင်းမှုများအတွက် လိုအပ်သော ကူညီဆောင်ရွက်မှုများကဲ့သို့ အခြေအနေများသည် တစ်ခုနှင့်တစ်ခု ဆက်နွှယ်လျက်ရှိနေသည်။ သို့ပါ၍ ပြောင်းလဲလာသော လူမှုအဖွဲ့အစည်းပုံစံများနှင့် လိုက်လျောညီထွေရှိသော တိုးတက်ဖွံ့ဖြိုးမှု အခြေအနေများအား အကောင်အထည်ဖော်ရန် လိုအပ်ပါကြောင်း The Daily Eleven သတင်းစာက ရေးသားအပ်ပါသည်။

Eleven Media Group

http://news-eleven.com/editorials/17067

အောက်တိုဘာ (၁၈) ထုတ် The Daily Eleven သတင်းစာ အယ်ဒီတာ့ အာဘော်