ဆင်းရဲမွဲတေမှုနှင့် အခြေခံလူ့အခွင့်အရေး

ကမ္ဘာ့ဒီမိုကရေစီ အင်စတီကျူးရှင်းများနှင့် လူ့အခွင့်အရေးအဖွဲ့များက ဆင်းရဲမွဲတေမှုသည် လူ့အခွင့်အရေးဆိုင်ရာ အကြောင်းအရာတစ်ရပ်ဖြစ်သည်ဟု ယုံကြည်ကြသည်။ ဆင်းရဲမွဲတေလျက် နေထိုင်နေကြရသည့် ကမ္ဘာတစ်လွှားမှ လူသန်းပေါင်းများစွာတို့သည် အခြေခံလူ့အခွင့်အရေး ချိုးဖောက်ခံနေရသူများဖြစ်သည်။ ကင်ညာနှင့် ကမ္ဘောဒီးယားကဲ့သို့သော နိုင်ငံများတွင် မိသားစုထောင်ပေါင်းများစွာသည် ဆင်းရဲမွဲတေလျက်ရှိသော အခြေအနေရပ်များ၌ နေထိုင်ရန် အတင်းအကျပ်ပြုခံရပြီး သက်ဆိုင်ရာအာဏာပိုင်များက ၎င်းတို့နှင့်ညှိနှိုင်းခြင်းမပြုဘဲ နေထိုင်ရာနေရာမှ ချက်ချင်းဖယ်ရှားခံရမည့် ခြိမ်းခြောက်မှုနှင့် အဆက်မပြတ် ရင်ဆိုင်နေရသည်။ အစ္စရေးက ကာဖျူးမိန့်များထုတ်ပြန်ခြင်းနှင့် လမ်းများကို ပိတ်ဆို့ထားခြင်းတို့ကြောင့် ပါလက်စတိုင်းကလေးများ ကျောင်းမသွားရသည့် အနေအထားမျိုးနှင့်လည်း ရင်ဆိုင်ရသည်။ ငယ်ငယ်ရွယ်ရွယ်နှင့် အတင်းအဓမ္မ အိမ်ထောင်ချထားခြင်းခံရပြီး မိခင်တစ်ဦးအား စောင့်ရှောက်မှု အခြေခံစံနှုန်းများ ပေးမထားသည့် လူ့အဖွဲ့အစည်းတွင် အမျိုးသမီးများစွာတို့ ကလေးမွေးဖွားစဉ် သေဆုံးကြရသည်။ ၎င်းတို့အားလုံးသည် အခြေခံလူ့အခွင့်အရေး ချိုးဖောက်ခံနေရသူများဖြစ်သည်။

ဆင်းရဲမွဲတေလျက် နေထိုင်နေရခြင်းသည် ရုပ်ဝတ္ထုပစ္စည်းချို့တဲ့ခြင်းထက် ပိုမိုဆိုးရွားသောအရာဖြစ်သည်။ ဆင်းရဲမွဲတေသူများသည် ၀ိုင်းပယ်ခံရခြင်း၊ ၎င်းတို့၏ဘ၀အပေါ် သက်ရောက်မည့် ဆုံးဖြတ်ချက်များနှင့် ပတ်သက်၍ ပါဝင်သြဇာသက်ရောက်ခွင့် မရခြင်းတို့ဖြင့် လူ့အခွင့်အရေးများ ဆုံးရှုံးလျက်ရှိသည်။ ဥပမာအားဖြင့် ကင်ညာနိုင်ငံ နိုင်ရိုဘီမြို့တွင် ဒေသခံအာဏာပိုင်များက အိမ်ရာဆောက်လုပ်မည့် ကုမ္ပဏီများကို မြေနေရာရောင်းချလိုသောကြောင့် လူပေါင်း ၇,၀၀၀ ကျော်ကို ၎င်းတို့နေထိုင်ရာနေရာမှ အတင်းအဓမ္မဖယ်ရှားရန် ကြိုးပမ်းမှုအား အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့ (AI) က ၀င်ရောက်ကန့်ကွက်ခဲ့သည်။ ညသန်းခေါင်ယံအချိန်၌ လူများကို နေအိမ်များမှ အတင်းမောင်းထုတ်ကာ အိမ်များကို ဘူဒိုဇာများဖြင့် ဖျက်ဆီးခြင်းပြုလုပ်ကြသည်။ ယင်းကဲ့သို့ပြုလုပ်စဉ် ပြုလုပ်သူများကို ရဲတပ်ဖွဲ့က အသင့်အနေအထားဖြင့် နေရာယူကာ ကာကွယ်ပေးထားသည်။ ယင်းကိစ္စသည် လူ့အခွင့်အရေးဆိုင်ရာ ပြဿနာဖြစ်ကြောင်း အငြင်းပွားဖွယ်ရာမရှိပါ။

နိုင်ငံတကာ အသိုင်းအ၀ိုင်းအနေဖြင့် ပဋိပက္ခများ သို့မဟုတ် ဘေးအန္တရာယ်များ၏ ဒဏ်ခံရသူများအား ကာကွယ်စောင့်ရှောက်မှုပေးရန်နှင့် ဖွံ့ဖြိုးရေးအတွက် ကူညီရန်တာဝန်ရှိသည်။ ၎င်းအပြင် စီးပွားရေးနှင့်လူမှုရေးဆိုင်ရာ တရားမျှတမှုများရရှိအောင် အဆက်မပြတ် အကောင်အထည်ဖော်ရေးသည်လည်း အရေးကြီးသည်။ နိုင်ငံအားလုံးအနေဖြင့် ယင်းအခြေခံအခွင့်အရေးအားလုံးကို သိမြင်ရန် သေချာရေးသည်လည်း အရေးကြီးသည်။ လူတိုင်းအနေဖြင့် လူနေမှုစံသတ်မှတ်ချက် အလုံအလောက်ရရေး၊ ငတ်မွတ်မှုမှကင်းဝေးရေး၊ အခြေခံကျန်းမာရေး စောင့်ရှောက်မှုရရှိရေးနှင့် အနည်းဆုံးအခြေခံအဆင့်ပညာရေးကို အခမဲ့သင်ယူခွင့်ရရေးတို့သည် နိုင်ငံတကာဥပဒေများအရ အခြေခံလူ့အခွင့်အရေးများဖြစ်သည်။ သို့သော် ဒုတိယကမ္ဘာစစ်ပြီးနောက် ရေးဆွဲထားသည့် မူရင်းလူ့အခွင့်အရေးဆိုင်ရာ သဘောတူညီချက်များသည် ယခုအခါ ဆယ်စုနှစ်ပေါင်းအတန်ကြာလာပြီးနောက် လမ်းကြောင်းများပြောင်းလာပြီး အစိုးရအဖွဲ့များကလည်း လိုက်နာလိုက လိုက်နာနိုင်ပြီး မလိုက်နာလိုပါကလည်း နေနိုင်သည်ဟု ယူဆလာကြသည်။ အစိုးရအဖွဲ့များအနေဖြင့် ၎င်းတို့၏ နိုင်ငံသားများအားလုံးကို ဆင်းရဲမွဲတေမှုနှင့် ပတ်သက်သော အခြေခံလူ့အခွင့်အရေးအတွက် တာဝန်ယူရန်လည်း စိန်ခေါ်မှုများနှင့် ရင်ဆိုင်နေရသည်။

မည်သို့ပင်ဆိုစေကာမူ ဆင်းရဲမွဲတေမှုကို အခြေခံလူ့အခွင့်အရေးနှင့် ယှဉ်တွဲစဉ်းစားခြင်းသည် ဆင်းရဲမွဲတေမှုလျှော့ချရေးအတွက် အကြီးအကျယ် အထောက်အကူပြုစေမည်ဟု ယုံကြည်ပါကြောင်း The Daily Eleven သတင်းစာက ရေးသားအပ်ပါသည်။

Eleven Media Group

http://news-eleven.com/editorials/16502

အောက်တိုဘာလ (၁၅) ရက်နေ့ထုတ် The Daily Eleven သတင်းစာ အယ်ဒီတာ့အာဘော်